وڏي وزير سان بلدياتي نمائندن جي ملاقات، اسڪيمن جي سارسنڀال ۽ سٺي ڪم کي يقيني بڻايو وڃي : هدايتون

ڪراچي (بيورو) سنڌ جي وڏي وزير سيد مراد علي شاهه مسلسل ٽئين ڏينهن حيدرآباد ڊويزن جي چئن ضلعن جي ضلعي ڪائونسلن، ٽائون ميونسپل ڪميٽين ۽ ٽائون ڪميٽين جي نون چونڊيل چيئرمينن ۽ وائيس چيئرمينن سان ملاقات ۽ ڳالهه ٻولهه ڪئي ۽ انهن تي زور ڀريو ته پارڪن، راندين جي ميدانن، پاڻي جي فراهمي ۽ صفائي سٿرائي سميت گهٽين ۽ پاڙن مان نيڪال جي پاڻي واري اسڪيمن کي بهتر ڪرڻ تي ڌيان ڏنو وڃي. هن چيو ته اسان جي شهرن ۽ ڳوٺن جو بنيادي مسئلو ناڪارو يا غير فعال سيوريج سسٽم آهي جيڪو گٽرن يا کليل نالن منجهان روڊن تي پاڻي وهي رهيو آهي. هن وڌيڪ چيو ته سندس حڪومت تقريبن سمورن ننڍن وڏن شهرن ۽ ڳوٺن ۾ سيوريج سسٽم ٺاهيا آهن پر انهن اسڪيمن تي ڌيان نه ڏنو ويو آهي، جنهن تي اوهان (چيئرمين) کي علائقن جي عوام جي وڏي مفاد ۾ ڌيان ڏيڻو پوندو. اجلاس ۾ مڪاني ادارن وارو وزير سيد ناصر شاهه، ايم پي اي اعجاز شاهه، دوست محمد جيسر، آصف شاهه ۽ ٻين شرڪت ڪئي، جڏهن ته مڪاني ادارن جي نمائندن ۾ چئن ضلعن ٽنڊو محمد خان، ڄامشورو، دادو جي ضلعي ڪائونسلن، ٽائون ميونسپل ڪميٽين ۽ ٽائون ڪميٽين ۽ بدين جي چيئرمين ۽ وائيس چيئرمين شرڪت ڪئي. وڏي وزير چيو ته هن مڪاني ادارن جي نون چونڊيل نمائندن سان ملاقاتون شروع ڪري ڇڏيون آهن ته جيئن انهن جا مسئلا ٻڌيا وڃن ۽ انهن جي رهنمائي ڪئي وڃي ته جيئن عوامي شڪايتن جي ازالي لاءِ ورڪنگ رليشن قائم ڪري سگهجي. هن چيو ته اسان جو اصل مقصد صوبي جي خدمت ۽ فرق پيدا ڪرڻ آهي. سنڌ جي وڏي وزير چيو ته هن پنهنجي دور ۾ هر شهر ۽ ڳوٺ ۾ واٽر سپلاءِ ۽ صفائي جون اسڪيمون تيار ڪيون آهن. هن چيو ته اسان ڳوٺن کي ترقي ڏني آهي ۽ پارڪ ٺاهيا آهن، ڳوٺن کي بازارن سميت مکيه شاهراهن سان ڳنڍڻ لاءِ روڊ ٺاهيا آهن. هن وڌيڪ چيو ته تيز برساتن ۽ ٻوڏ سبب ڪجهه ننڍا روڊ ٽٽا آهن جڏهن ته ڪجهه سيوريج اسڪيمن تي ڌيان نه ڏيڻ سبب مقصد پورو نه ٿي سگهيو آهي. وڏي وزير چيو ته هاڻي اوهان (بلدياتي ادارن جي چونڊيل نمائندن) اقتدار سنڀاليو آهي ۽ اوهان کي نه رڳو اسڪيمن جي مالڪي ڪرڻي آهي پر اوهان کي پنهنجي علائقن ۾ هر هڪ سِر ۽ سامان پاڻ لڳائڻو آهي. هن چيو ته اهي اسڪيمون عوامي ملڪيت آهن ۽ توهان انهن جا محافظ آهيو، اميد آهي ته اهي اسڪيمون عوام جي مفاد ۾ صحيح نموني هلنديون. مراد علي شاهه مڪاني ادارن جي چيئرمينن تي زور ڀريو ته هو پنهنجي علائقن مان حددخليون ختم ڪن، پنهنجي ڳوٺن کي خوبصورت بڻائين، راندين جا ميدان تيار ڪن، ثقافتي ۽ راندين جي سرگرمين کي هٿي وٺرائن ۽ بلدياتي ادارن جو هر هڪ ملازم ايمانداري سان ڪم ڪري. مڪاني ادارن جي چيئرمينن جي درخواست تي وڏي وزير مڪاني ادارن واري وزير سيد ناصر شاهه کي هدايت ڪئي ته هر ٽائون ڪميٽي کي گاڏيون فراهم ڪيون وڃن ۽ گهٽ ۾ گهٽ هر تعلقي هيڊڪوارٽر ۾ فائر ٽينڊرز جون سهولتون فراهم ڪيون وڃن. وڏي وزير مڪاني ادارن واري وزير سيد ناصر شاهه کي هدايت ڪئي ته هو هر ٽائون ڪميٽي کي ڪچرو کڻڻ لاءِ گاڏيون فراهم ڪن ۽ گهٽ ۾ گهٽ هر تعلقي هيڊ ڪوارٽر ۾ فائر ٽينڊرز جون سهولتون فراهم ڪيون وڃن. ان موقعي تي ڳالهائيندي مڪاني ادارن واري وزير ناصر شاهه چيو ته سمورن ٽائون ۽ ضلعي ڪائونسلن جي بجيٽ ۾ 50 سيڪڙو اضافو ڪيو ويو آهي. هن وڌيڪ چيو ته مڪاني ادارن واري کاتي کي فنڊز ۽ مشينري فراهم ڪري مڪاني ادارن کي مضبوط ڪيو ويندو.   ناصر شاهه چيو ته وڏي وزير سنڌ سالڊ ويسٽ مئنيجمينٽ بورڊ جو دائرو سمورن ضلعن تائين وڌائڻ جي هدايت ڪندي چيو آهي ته ريسڪيو 1122 جو دائرو سمورن ضلعن، تعلقن ۽ ڳوٺن تائين وڌايو ويندو. مڪاني ادارن جي نمائندن سندن شڪايتون ٻڌي ازالي جا حڪم جاري ڪرڻ تي وزير وڏي وزير جا ٿورا مڃيا.