ٽنڊوآدم ويجهو مڙس جي گهر ۾ مبينا زهر پيارڻ سبب عورت فوت،وارثن پاران قتل جو الزام
ٽنڊو آدم/شهدادپور (نمائندن وٽان) تعلقا ٿاڻو ٽنڊي آدم جي حد ڳوٺ مير خان بوزدار ۾ ساهراڻي گهر ۾مبينا طور زهر پيارڻ سبب ٻن ٻارن جي ماءُ سيما گل زال محمد اسحاق بوزدار فوت ٿي وئي۔ پوليس پهچي لاش کي پنهنجي تحويل ۾ وٺي سرڪاري اسپتال منتقل ڪيو جتي پوسٽ مارٽم بعد لاش مائٽن حوالي ڪيو ويو ، فوتي عورت جي والد گلشير بوزدار پنهنجي ناٺي ۽ سندس گهرڀاتين تي الزام هڻندي چيو ته ڌيءَ سيما گل کي سندس مڙس اسحاق بوزدار، ڏير محمد بوزدار ۽ سندن ڀيڻ شاهده زهر پياري قتل ڪيو آهي۔ تعلقي ٿاڻي تي 6 ڏينهن اڳ فوتي عورت جي والد گلشير بوزدار 3 جوابدارن ناٺي اسحاق بوزدار، محمد خان بوزدار ۽ سندن ڀيڻ شاهده خلاف ڪيس داخل ڪرايو هو، جنهن ۾ فريادي ڄاڻايو هو ته 12 ڏينهن اڳ مڙس محمد اسحاق بوزدار ۽ سندس ڀاءُ محمد خان بوزدار منهنجي ڌيءَ سيما گل کي گهر اڳيان ڳڻتي جوڳي حالت ۾ اڇلائي ويا هئا،۔پڇا ڪرڻ تي ڌيءَ ٻڌايو ته مڙس پنهنجي ڀاءُ ۽ ڀيڻ سان گڏجي قتل جي ارادي سان زهر پياريو آھي ۔ ڌيءَ اڳ ۾ به پنهنجي مڙس، ڏير ۽ نڻان پاران مٿس تشدد ڪرڻ جون دانهون پڻ ڏيندي رهي آھي،۔ وارثن اعليٰ اختيارين کان گهر ڪئي ته جوابدارن کي جلد گرفتار ڪري اسان سان انصاف ڪيو وڃي.