لاڙڪاڻو(بيورو رپورٽ) لاڙڪاڻو پريس ڪلب طرفان يوم استحصال ڪشمير جي عنوان سان پريس ڪلب جي صدر غلام مرتضيٰ ڪلهوڙو جي صدارت هيٺ سيمينار ڪوٺايو ويو، جنهن کي صدارتي خطاب ڪندي پريس ڪلب جي صدر غلام مرتضيٰ ڪلهوڙو چيو ته پاڪستان جي رياست ۽ پاڪ فوج جو شروعات کان اهو چٽو موقف آهي ته ڪشميري ڀائرن کي حق خوداراديت ڏياريو وڃي، والاريل ڪشمير ۾ گذريل 75 سالن کان وٺي ڪشميرين کي حراسان ڪري کنڀي گم ڪرڻ سان گڏ کين قيد ڪري ازيتون ڏنيون پيون وڃن، مختلف وقتن تي ميڊيا اهڙن واقعن کي رپورٽ ڪندي رهي آهي، پر اتي قابض هندستاني فوج پنهنجي انتهاپسند وزيراعظم نريندر مودي جي چوڻ تي ظلم ڪري رهي آهي، اهڙي فوج ڪشي جي اسين سخت لفظن ۾ مذمت ڪندي اقوام متحده کان مطالبو ٿا ڪريون ته فوري طور هندستاني فوج کي والاريل ڪشمير مان نيڪالي ڏئي ڪشميرين کي حق خوداراديت ڏياري وڃي. ان موقعي تي لاڙڪاڻو پريس ڪلب جي جنرل سيڪريٽري نويد لاڙڪ چيو ته والاريل ڪشمير ۾ ڪشميري ڀينرن، ڀائرن ۽ بزرگن سان سالن کان وٺي هندستان جي فوج جو ظلم ۽ بربريت جاري آهي ان ۾ ڪيترن ئي ڪشميرين شهادتون ماڻيون آهن، جن شهيدن کي اسين سلام پيش ٿا ڪريون ۽ اقوام متحده کان مطالبو ٿا ڪريون ته ڪشميرين مٿان جاري ظلم بند ڪيو وڃي. سينيئر صحافي ڊاڪٽر بدر شيخ چيو ته والاريل ڪشمير ۾ ڪشميري مسلمانن مٿان ٿيندڙ ظلم تي عالمي دنيا خاموش تماشائي بڻيل آهي، پوري دنيا ۾ 55 کان وڌيڪ مسلمان ملڪ آهن، پر ان جي باوجود ڪشميري ڀائر هندستان کان آزادي حاصل ڪري نه سگهيا آهن، ان مسئلي تي مسلمان ملڪن کي ڀرپور آواز اٿارڻ گهرجي. پريس ڪلب جي خزانچي پنهنجي خطاب ۾ چيو ته نريندر مودي انتهاپسند ذهنيت رکندڙ شخص آهي، جنهن نه صرف والاريل ڪشمير پر هندستان ۾ به مسلمانن جي اظهار آزادي تي ڌاڙو هڻي ظلم ڪري رهيو آهي ۽ هندستاني حڪومت هوڏ تي اقوام متحده جي قراردادن تي عمل نه پئي ڪري، ان معاملي جو اقوام متحده کي نوٽيس وٺي ڪشمير ۾ جاري ظلم بند ڪرايو وڃي. آرٽ ڪائونسل جي اڳوڻي صدر انجنيئر جاويد شيخ چيو ته 5 آگسٽ 2019ع تي والاريل ڪشمير جي خصوصي حيثيت ختم ڪري ۽ ڪشميرين جي بنيادي حقن به کسيا ويا ۽ 30 کان 40 ڪشميري اڳواڻن کي قيد ۾ رکيو ويو جيئن هو هن مسئلي تي آواز نه اٿاري سگهن. سيمينار کي خطاب ڪندي پريس فوٽوگرافر اينڊ ڪيمرامين ايسوسيئيشن جي صدر نديم اختر سومرو، يوسف شيخ ۽ ٻين چيو ته ڪشمير جي آزادي لاءِ شهادتون ماڻيندڙ شهيدن جو خون رائيگان نه ويندو، والاريل ڪشمير جي خصوصي حيثيت ختم ٿيڻ کان پوءِ اتي چئن سالن کان وٺي ڪرفيو جي صورتحال آهي، پر ان جي باوجود ڪشميري ڀائرن جا حوصلا بلند آهن، اهو ڏينهن ڀري جو ڪشميري ڀائر هندستاني جي ظالم فوج ۽ اتان جي انتهاپسند حڪومت کان نجات حاصل ڪندا. سيمينار ۾ سينيئر صحافين منير احمد سومرو، حفيظ منگي، خان راجا مگسي، محمد ادريس بلوچ، راجا گاڏهي، نادر مائري، وسيم ڀٽو، محسن گل پٺاڻ، نويد سومرو، جاويد جنجهوٽا، حميد ڀٽو، علي گل ڏيٿو، مومن ڪنگو، الطاف کهاوڙ، ذيشان کوکر ۽ ٻيا پڻ موجود هئا. سيمينار جي پڄاڻيءَ تي ڪشميري شهيدن جي بلند درجات لاءِ فاتح خواني ڪري خصوصي دعا پڻ گهري وئي.
