ٽنڊوڄام(ن م)سنڌ زرعي يونيورسٽي جي سمورين فيڪلٽيز، انفارميشن ٽيڪنالاجي سينٽر، انسٽيٽيوٽ آف فوڊ سائنسز اينڊ ٽيڪنالاجيز، سلھاڙيل ذوالفقار علي ڀٽو زرعي ڪاليج ڏوڪري، خيرپور ڪاليج آف ايگريڪلچرل انجنيئرنگ اينڊ ٽيڪنالاجي ۽ سب ڪيمپس عمرڪوٽ ۾ تدريسي سال 24-2023 جي انڊر گريجوئيٽ ڊگري پروگرام ۾ داخلائن لاءِ ٽيسٽ ورتي وئي، جنھن لاءِ پهريون ڀيرو بلوچستان جي صوبائي راڄڌاني ڪوئيٽا ۾ بلوچستان يونيورسٽي آف انفارميشن ٽيڪنالاجي، انجنيئرنگ اينڊ مئنيجمينٽ سائنسز سميت، حيدرآباد پبلڪ اسڪول، سکر پبلڪ اسڪول، ۽ عمرڪوٽ ۾ سب ڪيمپس ۾ انٽري ٽيسٽ سينٽر قائم ڪيا ويا ھئا، جنھن ۾ سڄي ملڪ مان 550 فيميل اميدوارن سميت 4203 اميدوارن محفوظ ماحول ۾ ٽيسٽ ڏني، اھڙن اميداورن ۾ 3146 پري ميڊيڪل، 988 پري انجنيئرنگ، 52 پري ڪمپيوٽر ۽ 17 ٻين شعبن جي اميدوارن حصو ورتو، حيدرآباد ۾ پبلڪ اسڪول لطيف آباد ۾ 56 بلاڪ ٺاهيا ويا هئا، جن ۾ فيميل اميدوارن لاءِ 9 الڳ بلاڪ شامل هئا، سکر ۾ 18، ڪوئيٽا ۾ 4 ۽ عمرڪوٽ ۾ 15 بلاڪ قائم ڪيا ويا، هن ٽيسٽ پاس ڪندڙ اميدوارن مان ڪل 2821 شاگردن کي يونيورسٽي ۽ ان سان لاڳاپيل ڪاليجن ۽ سب ڪيمپس ۾ داخلا ڏني ويندي، ان موقعي تي سنڌ زرعي يونيورسٽي جي وائيس چانسلر ڊاڪٽر فتح مري حيدرآباد سينٽر جو دورو ڪيو ۽ انٽري ٽيسٽ لاءِ ڪيل انتظامن تي اطمينان جو اظهار ڪيو، ميڊيا سان ڳالھائيندي ڊاڪٽر فتح مري چيو ته شاگرد يونيورسٽي جي ڊگري پروگرامن ۾ وڏي دلچسپي وٺي رهيا آهن، ايگريڪلچر، ويٽرنري، ايگريڪلچر انجنيئرنگ ۽ انفارميشن ٽيڪنالاجي کان علاوه شاگردن لاءِ مختلف ڊگري نوان پروگرام شروع ڪيا ويا آهن، هن ٻڌايو ته گذريل سال کان يونيورسٽي سان لاڳاپيل ڪاليجن ۽ سب ڪيمپس ۾ پڙهڻ جي خواهش رکندڙ شاگردياڻين جي داخلا فيس معاف ڪئي وئي آهي، جڏهن ته شاگردن لاءِ اسڪالرشپ جا به ڪيترائي موقعا آهن. ٻئي طرف سکر سينٽر ۾ ڊين ڊاڪٽر منظور علي ابڙو، ڪوئيٽا ۾ ڊاڪٽر سيد غياث الدين شاهه راشدي ۽ پرو وائيس چانسلر ڊاڪٽر جان محمد مري سب ڪيمپس عمرڪوٽ جو دورو ڪيو ۽ انتظامن جو جائزو ورتو.
