ملڪ جي سلامتي خاطر اليڪشن ڪجهه وقت ملتوي ٿئي ٿي ته ڪو به حرج ناهي: اعليٰ حضرت پيرسائين پاڳارا

ڪراچي(بيورو) جي ڊي اي ۽ پاڪستان مسلم ليگ فنڪشنل جي سربراهه ۽ حرن جي روحاني پيشوا اعليٰ حضرت پيرسائين پاڳارا پاڪستان-ايران لاڳاپن ۾ وڌندڙ ڇڪتاڻ تي گهري ڳڻتي جو اظهار ڪندي ملڪ جي سمورين سياسي پارٽين تي زور ڏنو آهي ته هو هن نازڪ گهڙي ۾ پنهنجي هٿياربند فوج جو ڀرپور ساٿ ڏين ۽ دشمنن تي واضح ڪن ته  پاڪستاني قوم ۽ تمام سياسي جماعتون وطن جي دفاع لاءِ متحد آهن.  اعليٰ حضرت پيرسائين پاڳارا چيو ته اسان ۽  حر جماعت هميشه وطن پاڪستان جي سلامتي ۽ دفاع لاءِ پنهنجي هٿياربند فوج سان گڏ بيٺا آهن ۽ گڏ رهندا. آزمائش جي هر گهڙيءَ ۾ حر مجاهد ۽ حر جماعت پاڪ فوج سان ڪلهو ڪلهي ۾ ملائي بيٺل آهي، پيرسائين پاڳارا وڌيڪ چيو ته عام چونڊن کان وڌيڪ ملڪي سلامتي اهم آهي، ملڪي سلامتي خاطر  ڪجهه وقت اليڪشن ملتوي ٿئي ٿي ته ان ۾ ڪو به حرج ناهي، ملڪ هوندو ته اليڪشن ٿيندي رهندي.