ملير ۾ ڳوٺاڻن جو قتل ٿيل نوجوانن جا قاتل گرفتار نه ٿيڻ خلاف مظاهرو، ڌرڻو
ملير (ڊ ر) ٻه مهينا اڳ ملير جي علائقي سومار ڳوٺ ۾ اسٽيٽ ايجنسي تي فائرنگ جي نتيجي ۾ بي گناهه اجل جو شڪارا ٿيندڙ حاجي عطر جوکيو ۽ زوار کوکر جي قاتلن جي گرفتاري لاءِ سومار جوکيو ڳوٺ لڳ مقتول جي وارثن عرفان جوکيو، حاجي عظیم جوکيو، نور احمد جوکيو، آصف کوکر جي اڳواڻي ۾ احتجاجي ريلي ڪڍي مظاھرو ڪري قومي شاهراهه تي ڌرڻو هنيو ويو، روڊ جي ٻنهي پاسن کان گاڏين جون ڊگهيون قطارون لڳي ويون، مظاهرين جي هٿن ۾ بينر ۽ پلي ڪارڊ هئا ۽ هنن قاتلن جي گرفتاري لاءِ اڀ ڏاريندڙ نعرا هنيا، جڏهن ته ڌرڻي ۾ قومي عوامي تحريڪ جي فياض اتيرو، پاڪستان مسلم ليگ نواز جي قادر بخش ڪلمتي، آل پاڪستان مري اتحاد جي ڪريم بخش مري، سنڌ ترقي پسند پارٽي جي خير محمد مگسي، عوامي راڄ تحريڪ جي بلاول لاکو، شيعا علماء ڪائونسل جي مولانا محمد حسين حسيني سميت هزارين ماڻهن شرڪت ڪئي، ان موقعي تي اڳواڻن چيو ته قتل جي واقعي کي ٻه مهينا گذري ويا آهن پر پوليس پنهنجي روايتي سستي برقرار رکيو اچي، جنهن سبب هر طرف بي چيني ۽ عدم تحفظ واري صورتحال آهي، افسوس ان ڳالهه جو آهي ته سنڌي ماڻهو پنهنجي ڌرتي تي ننڌڻڪا لڳا پيا آهن ۽ ڪرپٽ سسٽم سبب مظلوم ماڻهن کي انصاف جي حاصلات لاءِ به روڊن تي نڪرڻو ۽ احتجاج ڪرڻو پوندو آهي، هي پهريون ڀيرو ناهي جو اسان زوار کوکر ۽ عطر جوکيو جو لاش وصول ڪيو هجي اهو سلسلو ڪافي وقت کان هلندو اچي جيڪو هاڻي بند ٿيڻ گهرجي، سندن چوڻ هو ته جيستائين انصاف نه مليو ته احتجاجن جو سلسلو جاري رهندو.7
