سمورين سياسي قوتن جي مفاد ۾ آهي ته چونڊون 8 فيبروري تي ٿين، ان ۾ ملڪ جي ڀلائي آهي: مرتضيٰ سولنگي
لاهور (اين اين آءِ) سڌ سماءِ جي نگران وزير مرتضيٰ سولنگي چيو آهي ته مڙني سياسي قوتن جي مفاد ۾ آهي ته چونڊون 8 فيبروري تي ٿين ان ۾ ئي ملڪ جي ڀلائي آهي. ليول پليئنگ فيلڊ جي شڪايت هر هڪ کي آهي. اصل ۾ ليول پليئنگ فيلڊ پاڪستان جي ورڪنگ ڪلاس وٽ ناهي، سياسي عدم استحڪام ۽ ملڪ جي معاشي بقا اسان جا اصل چئلينجز آهن. اسان کي معاشي صورتحال ۾ بهترين جي ضرورت آهي. اهڙن خيالن جو اظهار هن الهمره ۾ ڪوٺايل افڪار تازه جي 7 ايڊيشن، ٿنڪ فيسٽ 2024ع جي پروگرام ۾ خيالن جو اظهار ڪندي ڪيو. ان موقعي تي اڳوڻو سينيٽر افرا سياب خٽڪ ۽ سينيئر صحافي حامد مير به موجود هئا. هن سوال جي جواب ۾ وفاقي وزير چيو ته پاڪستان جي آئين ۾ لکيل آهي ته هي ملڪ ان جا چونڊيل نمائيندا هلائيندا. هي ملڪ آئين جي موجودگي ۾ ئي هلي سگهي ٿو. هن چيو ته سمورن سياسي قوتن ۽ لاڳاپيل ڌرين جي مفاد ۾ آهي ته چونڊون 8 فيبروري تي ٿين ان ۾ ئي ملڪ جي ڀلائي آهي. هن چيوته چونڊون خميس 8 فيبروري 2024ع تي ٿينديون. ليول پليئنگ فيلڊ بابت سوال جي جواب ۾ وفاقي وزير چيو ته ليول پليئنگ فيلڊ جي شڪايت هر ڪو ڪري رهيو آهي. پيپلزپارٽي ۽ مسلم ليگ ن کي به ليول پليئنگ فيلڊ جون به شڪايتون آهن. جڏهن ته مولانا فضل الرحمان جو به چوڻ آهي ته خيبرپختونخواهه ۽ بلوچستان ۾ ليول پليئنگ فيلڊ ناهي، هن چيو ته اصل ۾ ليول پليئنگ فيلڊ پاڪستان جي ورڪنگ ڪلاس وٽ ناهي، جيستائين بنيادي تبديلي نه اچي ۽ عام ماڻهو اليڪشن ۾ ووٽ نٿو گهري سگهي، ليول فيلڊ نه ٿي اچي سگهي، گذريل ڏينهن عدليا جي فيصلي جي حوالي سان سوال جي جواب ۾ هن چيو ته هي هڪ سٺو مثال آهي. هر سياسي پارٽي کي پنهنجن ميمبرن کي ووٽ جو حق ڏيڻ گهرجي. بهتر ٿي ها ان حوالي سان پينل ۾ قانوني ماهر موجود هجن ها ۽ اهي قانوني موقف بيان ڪن ها. مرتضيٰ سولنگي چيوته سياسي عدم استحڪام ۽ ملڪ جي معاشي بقا اسان جا اصل چئيلنجز آهن. ايندڙ حڪومت کي معاشي چئينلجز آڏو اچي سگهن ٿا. هن چيو ته اسان کي معاشي صورتحال ۾ تبديلي جي ضرورت آهي.1