ملڪ ۾ لاقانونيت جو راڄ آهي، حڪمران ملڪ لٽي رهيا آهن، انتظاميه گهري ننڊ ۾ آهي: سيد محمد راشد شاهه راشدي
خيرپور/گمبٽ/پيرجوڳوٺ (نمائندن وٽان) مسلم ليگ فنڪشنل سنڌ جي نائب صدر ۽ ايم پي اي سيد محمد راشد شاھ راشدي چيو آھي ته ھن وقت ملڪ ۾ لاقانونيت جو راج آھي، حڪمران ملڪ کي لٽي رھيا آھن جڏھن ته انتظاميا گھري ننڊ ۾ آھي. ھن اھڙين ڳالھين جو اظھار گمبٽ ۾ اڳوڻي ميونسپل ڪميٽي گمبٽ جي چيئرمين خالد حسين شيخ پاران سندس اعزاز ۾ ڏنل دعوت جي موقعي تي ورڪرز ڪنوينشن کي خطاب ڪندي ڪيو. سيد محمد راشد شاھ راشدي وڌيڪ چيو ته مسلم ليگ فنڪشنل جي آرگنائيزيشن جي لاءِ آئون عوامي مھم تي نڪتل آھيان ۽ مون کي اُميد آھي ته سڀ گڏجي فنڪشنل مسلم ليگ کي متحد ڪندا. فنڪشنل مسلم ليگ مضبوط ھوندي ته ملڪ ۾ حقيقي حڪمراني ايندي. آئون خالد حسين شيخ جو شڪرگذار آهيان ان جا ۽ اسان جي خاندان جا پراڻا تعلقات آھن ۽ انشاءَ الله تعلقات قائم ۽ دائم رھندا. سيد محمد راشد شاھ راشدي وڌيڪ چيو ته فنڪشنل مسلم ليگ ۽ حُر جماعت جا نوجوان ورڪر ۽ ڪارڪن گھر گھر وڃي پيغام.پھچائين ۽ غريب بي پھچ ماڻھن جا شناختي ڪارڊ ٺھرائين ۽ وڌ کان وڌ ووٽ داخل ڪرائين. ان کان علاوه اسان مسلم اسٽوڊنٽس فيڊريشن کي منظم ۽ مضبوط ڪنداسين ۽ سڀ گڏجي خدمت ڪنداسين. سيد محمد راشد شاھ راشدي وڌيڪ چيو ته ڪنڌڪوٽ، ڪشمور، شھدادڪوٽ، گھوٽڪي ۽ خيرپور ۾ ڀنگ جي لاءِ اغوا جا واقعا روز جو معمول بڻجي ويا آھن. ظلم ۽ بربريت عروج تي آھي، ڪراچيءَ ۾ نوجوان مدثر شر جو وحشياڻو قتل ٿيو آھي جنھن جي وارثن جي فرياد به ناھي ٻڌي وئي. آئون اعليٰ اختيارين کان گھر ٿو ڪريان ته مدثر شر جي قاتلن کي فوري طور گرفتار ڪري قانون جي ڪٽهڙي ۾ آڻي وارثن کي انصاف فراھم ڪيو وڃي. ھر طرف لاقانونيت آھي رشوت جي بازار گرم آهي ۽ حڪمران عوام کي ڏکن کان سواءِ ڪجھه به ناھن ڏئي سگھيا. فنڪشنل مسلم ليگ جي ورڪرن، علماءِ ڪرام، شاگرد تنظيمن، مزدور برادري ۽ حُر جماعت جي نوجوانن کي گذارش ڪريان ٿو ته فنڪشنل مسلم ليگ کي مضبوط ڪن. صوبي مان لاقانونيت، رشوت ۽ ظلم بربريت جي خلاف اسان کي جدوجھد جاري رکڻي پوندي. سيد محمد راشد شاھ راشدي وڌيڪ چيو ته آءُ پير سائين پاڳارا جو فرزند ھوندي به عام ڪارڪن ۽ پيرسائين پاڳارا جو مريد ۽ حُر آھيان. منھنجي ڏاڏي حضرت پير سيد شاھ مردان شاھ ۽ منھنجي والد پير سائين پاڳارا جو پيغام گھر گھر پھچائيندس. چاھي گرمي ھجي، سردي، طوفان هجي يا بارش. منھنجو مقصد تعليم، صحت، ترقياتي ڪم، قانون جي بالادستي قائم ڪرائڻ آھي، انھيءَ تبليغ لاءِ پيدا ٿيو آھيان ۽ تبليغ تي قائم رھندس ۽ پنھنجي بابا ۽ ڏاڏا سائين جو پيغام گھر گھر پھچائيندس. پنھنجي علماءِ اڪرام کي به گذارش ڪندس ته ديني تبليغ جاري رکي وڃي. ھر وقت درود ۽ سلام جو ورد جاري رکيو وڃي ۽ الله تبارڪ و تعاليٰ جي عبادت ڪئي وڃي. الله تعاليٰ پنھنجي محبوب ڪريم صلي الله عليه وآله وسلم جي صدقي اسان سڀني تي پنھنجو رحم ۽ ڪرم فرمائي.
