راڻيپور پوليس جي حراست ۾ مبينا تشدد دوران زخمي نوجوان اسپتال ۾ فوت،وارثن پاران پوليس تي مارڻ جو الزام
راڻي پور(ن م) راڻي پور پوليس حراست ۾ دوران مبينا طور شاھه مراد بروهي کي تشدد ڪري مرڻينگ ڪري ڇڏيو، جنھن کي ڳڻتي جوڳي حالت ۾ گمس منتقل ڪيو ويو هو، جتي ھو زخمن جا سور نه سهندي فوت ٿي ويو، جنھن بعد فوتي جي وارثن جو قومي شاهراهه تي لاش رکي ڌرڻو ھڻي ٽائرن کي باھيون ڏئي ويھي رھيا. جنھن سبب قومي شاھراھ جي ٻنھي طرفن کان گاڏين جون وڏيون قطارون لڳي ويون. ڌرڻو 8 ڪلاڪ جاري رھڻ بعد ايس ايس پي خيرپور جي مظاھرين سان ڪامياب ڳالھين بعد ڌرڻو ختم ڪيو ويو. ڌرڻي تي ويٺل فوتي جي وارثن نورجهان بروھي، اسماعيل بروھي ۽ ٻين ميڊيا سان ڳالهائيندي چيو ته پوليس پيار جي پرڻي جي عيوضي ۾ پوليس شاهھ مراد کي گرفتار ڪيو هو. جنھن مٿان ھنن مٿس تشدد ڪيو جنھن دوران ھو شديد زخمي ٿي پيو ۽ سخت زخمي حالت ۾ گمس اسپتال آندو ويو جتي ھو زخمن جا سور نه سھندي فوت ٿي ويو.ھنن گھر ڪندي چيو ته اسان سان انصاف ٿئي جڏھن ته اھو الزام ھڻندي پڻ چيو ته پوليس شيخن کان پئسه وٺي اسان جو ماڻھو ماريو آھي. ھنن وڌيڪ چيو ته راڻيپور ريلوي اسٽيشن جي رهواسي احسان بروھي ۽ مسمات مسڪان شيخ پاڻ ۾ پيار جي پرڻو ڪيو هو. جنهن جي عيوضي ۾ راڻيپور پوليس شاھ مراد بروھي کي گرفتار ڪري تشدد ڪيو. اسان جي اعليٰ اختيارين نگران وزير اعليٰ سنڌ ۽ آئي جي سنڌ، ايس ايس پي خيرپور سميت وس وارا ادارا ان معاملي جو نوٽيس وٺي اسان سان انصاف ڪن ٻئي صورت ۾ احتجاج جاري رھندو. جنھن بعد ايس ايس پي خيرپور سميع الله سومرو راڻي پور ڌرڻي واري ھنڌ پھچي وارثن سان ڪامياب ڳالھيون ڪري کين مڪمل انصاف جي يقين ڌيانيءَ تي ڌرڻو ختم ڪرايو. ۽ فوتيءَ جي پوسٽ مارٽم رپورٽ اچڻ بعد ملوثن تي ايف آءِ آر داخل ڪئي ويندي. جنھن بعد ڌرڻو ختم ڪيو ويو. جيڪو 8 ڪلاڪنن تائين جاري رھيو.
